 |
| Bəxtiyar Hacıyev |
Həbsdə olan gənc fəal Bəxtiyar Hacıyevin hüquqlarını müdafiə etmək üçün yaradılan Avropa komitəsi ilkin addım kimi Avropa Birliyinə, Avropa Parlamentinə və Avropa Komissiyasına, Avropa Şurasına və ATƏT-ə müraciət ünvanlayıb.
Müraciətində komitə üzvləri qarşıdan gələn məhkəmələri zamanı Bəxtiyar Hacıyevin azad edilməsi üçün Azərbaycan hakimiyyəti ilə danışıqlar aparılmasını xahiş ediblər.
Avropa liderlərinə ünvanlanmış məktubda deyilir: “Avropa vətəndaşları və Avropa ilə eyni dəyərləri daşıyan hər birimiz sizi dünyanın güclü demokratiyalarından biri kimi Bəxtiyar Hacıyevin azad edilməsi üçün Azərbaycan prezidentinə müraciət etməyə səsləyirik”.
Bəxtiyar Hacıyevin hüquqlarını müdafiə etmək üçün yaradılmış Avropa komitəsində beynəlxalq tələbə təşkilatı olan AIESEC, Avropa və Avrasiya Gənc Siyasi Liderlər Şəbəkəsi və BMT sessiyasında Bəxtiyarla bərabər və ondan sonra iştirak etmiş gənc nümayəndələr təmsil olunurlar.
ABŞ-ın Harvard Universitetinin məzunu Bəxtiyar Hacıyev 2011-ci ilin martında Gəncədə tutulub və 2 il müddətinə azadlıqdan məhrum edilib. O, Cinayət Məcəlləsinin 321.1-ci (qanuni əsas olmadan hərbi xidmətdən yayınmaq üçün növbəti hərbi çağırışdan və ya səfərbərlik üzrə çağırışdan boyun qaçırma) maddəsi ilə təqsirli bilinib. Penitensiar Xidmətin Bakıdakı 14 saylı Cəzaçəkmə Müəssisəsində saxlanır.
2011-ci ilin dekabrında Qaradağ Rayon Məhkəməsi Bəxtiyar Hacıyevin vaxtından əvvəl azadlığa buraxılmasına dair müraciətini təmin etməyib. Bu qərardan Bakı Apellyasiya Məhkəməsinə şikayət verilib. Apellyasiya şikayətinə baxış fevralın 27-də olacaq.
