Avropa İnsan Hüquqları Məhkəməsi 2005-ci ilin parlament seçkisində baş verən pozuntularla bağlı Azərbaycana qarşı daha iki iş üzrə - Bəybala Əbilin və Xanhüseyn Əliyevin şikayətləri ilə bağlı qərarlarını açıqlayıb.
2005-ci ilin parlament seçkisi zamanı Klassik Xalq Cəbhəsi Partiyası 11 saylı Qaradağ seçki dairəsindən B.Əbilin namizədliyini, YES bloku isə 58 saylı Hacıqqabul-Kürdəmir seçki dairəsindən X.Əliyevin namizədliyini irəli sürüb. Hər iki şəxsin namizədliyi dairə seçki komissiyalarında qeydə alınsa da, sonradan ləğv edilib.
Avropa Məhkəməsi hər iki işdə şikayətçilərin azad seçki hüququnun pozulduğunu tanıyıb. Avropa Məhkəməsi vurulmuş mənəvi ziyana görə şikayətçilərin hər birinə 7500 avro, B.Əbilə əlavə olaraq məhkəmə xərclərinə görə 1600 avro kompensasiya ödənilməsi barədə qərar qəbul edib.
B.Əbilin hüquqlarını Avropa Məhkəməsi qarşısında İntiqam Əliyev, X.Əliyevin hüquqlarını isə Eldar Zeynalov təmsil edib.
“Media forum” saytına açıqlamasında İntiqam Əliyev deyib ki, Avropa Məhkəməsinin bu iki qərarı seçki özbaşınalığının daha bir növü - namizədlərin qeydiyyatının ləğvi ilə adı altında hökumətin törətdiyi qanunsuzluqlara verilən qiymətdir: “Bu qərarlarla Avropa Məhkəməsinin 2005-ci ilin parlament seçkisində baş verən pozuntularla bağlı şikayətlər üzrə çıxardığı qərarların sayı 17 oldu. Avropa Məhkəməsi bu 17 qərarında faktiki olaraq Azərbaycanda seçkinin saxtalaşdırıldığı bütün sahələrə işıq saldı və hökumətə “ayıbdır, bu cür olmaz” mesajını verdi. Hökumət nəticə çıxarmalıdır. Bu qərarların əhəmiyyətini nə şişirtmək, nə də azaltmaq gərəkdir. Bu qərarlar haqlarımız, o cümlədən onların ən vacibindən olan azad seçki haqqımız uğrunda cəmiyyətin apardığı mübarizənin tərkib hissəsidir”.
Bundan öncə Avropa Məhkəməsi 2005-ci ilin parlament seçkisi ilə bağlı 7 nəfərin – Mirəziz Seyidzadə (71 saylı Masallı seçki dairəsi), 93 saylı Bərdə şəhər seçki dairəsi), Namət Əliyev (93 saylı Bərdə şəhər seçki dairəsi), Flora Kərimova (42 saylı Sumqayıt 2-ci seçki dairəsi), Əli Kərimli (31 saylı Suraxanı 2-ci seçki dairəsi), Arif Hacılı (110 saylı Zaqatala seçki dairəsi), Qulamhüseyn Əlibəyli (69 saylı Cəlilabad-Masallı-Biləsuvar seçki dairəsi) və Sərdar Cəlaloğlunun (9 saylı Binəqədi 2-ci seçki dairəsi) şikayətlərinin təmin edilməsi barədə qərar çıxarıb.
7 nəfərin, yəni İsa Qəmbər (20 saylı Nərimanov 2-ci seçki dairəsi), Elçin Rzayev (96 saylı Goranboy seçki dairəsi), Fuad Mustafayev (21 saylı Nəsimi 1-ci seçki dairəsi), Yaqub Məmmədov (22 saylı Nəsimi 2-ci seçki dairəsi), İlham Hüseyn (31 saylı Suraxanı 2-ci seçki dairəsi – təkrar seçkilər), Mirmahmud Mirəlioğlu (42 saylı Sumqayıt 2-ci seçki dairəsi – təkrar seçkilər) və Eldar Namazovun (15 saylı Yasamal seçki dairəsi) işində Avropa Məhkəməsi şikayətlərdə göstərilən pozuntuları hökumətin tanıması barədə birtərəfli bəyanatı əsasında şikayətləri baxdığı işlərin siyahısından çıxarıb (hökumətin üzərinə götürdüyü öhdəliklərin icrasına Avropa Şurası Nazirlər Komitəsinin nəzarət etməsi şərti ilə).
Bir nəfərin - İsmayıl Səlimovun (27 saylı Sabunçu 2-ci seçki dairəsi) şikayəti hökumətin barışıq sazişi barədə təklifini qəbul etdiyi üçün baxılan işlərin siyahısından çıxarılıb.
Avropa Məhkəməsinin daha bir neçə iş üzrə qərarının yaxın vaxtda elan ediləcəyi gözlənilir ki, onların arasında AXCP sədrinin müavini Həsən Kərimovun (29 saylı Səbail seçki dairəsi) da işi var.
