 |
| Rövşən Əhmədli |
“Zorakılıq həmişə zorakılıq doğurur. Bir dövlətin öz vətəndaşları ilə zor dilində danışması qəbuledilməzdir. İnsanların cibinə tiryək atmaqla, evlərə, maşınlara silah qoymaqla, belə formada güc göstərməklə heç nəyə nail olmaq mümkün deyil”. İslam Partiyası sədrinin müavini Rövşən Əhmədli “Media forum” saytına belə deyib.
Fevralın ikinci yarısından Azərbaycanda dini kəsimin həbsləri aparılır. Onların bir qismi ağır cinayətlərdə, o cümlədən dövlətə xəyanətdə ittiham olunur.
Rövşən Əhmədli qeyd edib ki, hansısa vətəndaşın əməlində qanunsuzluq varsa, bunun qarşısı cinayət törətməklə, qanunsuzluqla alına bilməz: “Qanunsuzluğun qarşısı qanunla alınmalıdır. Kiminsə cibinə tiryək atmaq, maşınına silah qoymaq cinayətdir. Dünyanın heç bir ölkəsində belə hal yoxdur, bu, yolverilməzdir. Cəmiyyətdə bu qədər narazılıq ola-ola əsassız həbslər, təqiblər fonunda yaxşı nəsə gözləmək mümkün deyil.
Dövlət orqanları son hadisələrə aydınlıq gətirməlidir: “Əgər həbslər islamla əlaqədardırsa, buna izahat verilməlidir. Sürətlə yayılan şayiələrə son vermək üçün bu məsələdə məsul olan rəsmilər açıqlamalar verməlidirlər. Cəmiyyət, xalq bizim dövlətdə nə baş verdiyini bilməlidir”.
Rövşən Əhmədli deyib ki, son günlər İslam Partiyasının neçə üzvünün tutulduğu məlum deyil: “Yalnız Gəncədə partiyanın bir üzvü həbs edilib. Digərləri haqda məlumat toplamağa çalışırıq.
Bütövlükdə neçə nəfərin həbs olunduğu bilinmir. Hər gün yeni həbslərlə bağlı məlumat daxil olur. Bəzi mənbələr görə, həbs olunanların sayı 30 nəfərə yaxındır.
Bu həbslər Azərbaycan cəmiyyətini dərindən narahat etməlidir. Çünki bu, bir siyasi partiyaya deyil, bütövlükdə ölkəyə aid məsələdir. Həbs olunanların ailələri deyir ki, mülki şəxslər gəlib adamları evlərindən aparırlar. Bəzilərini polis bölmələrinə dəvət edirlər, sonra hara apardıqları məlum olmur. Ailələri günlərlə axtarır, yaxınlarının harada saxlandığını öyrənmək istəyirlər, amma mümkün olmur. Həbs olunan islamçıların böyük əksəriyyəti narkotik saxlamaqda ittiham olunurlar. Bunun nə demək olduğunu Azərbaycan cəmiyyəti başa düşür. Axı bu normal deyil. Ölkədə konstitusiya, qanun işləməlidir. Cəmiyyət bu hadisələrə sərt təpki göstərməlidir”.
