 |
| Əhməd Müntəziri |
Mərhum dissident ayətullah Hüseynəli Müntəzirinin oğlu Əhməd Müntəzirinin evində axtarış həyata keçirilib.
“Media forum” saytının məlumatına görə, axtarış fevralın 19-u günortaçağı aparılıb. ETTELAAT-ın Qum şöbəsinin əməkdaşları Əhməd Müntəziriyə və onun mərhum atasına məxsus bir sıra əşyaları götürüb aparıblar.
Əhməd Müntəziri “Azadlıq” radiosunun fars redaksiyasına açıqlamasında baş vermiş hadisədən danışıb: “Mülki geyimli təhlükəsizlik əməkdaşları əvvəlcə şəhər icra hakimiyyətinin məmuru olduqlarını bildirdilər. Lakin qapını açandan sonra zorla evə daxil olub hər yeri axtarmağa başladılar. Onlar puldan tutmuş mərhum atamın çıxışlarından ibarət CD-lərəcən bir çox əşyanı toplayıb apardılar. ETTELAAT əməkdaşları həmçinin gənc ruhanilərin istifadəsinə verməyə hazırlaşdığımız, atama məxsus olmuş kitabxananın qapısını bağlayıb möhürlədilər”.
Ay yarım qabaq Əhməd Müntəziri İran İslam Respublikasının dini lideri ayətullah Əli Xamneyiyə açıq məktub yazaraq ona siyasətinə yenidən baxmağı təklif etmişdi.
Ayətullah Hüseynəli Müntəziri İran islam inqilabının lideri ayətullah Xomeyninin ilk canişini olub. Vaxtilə o, İran İslam Respublikasında həyata keçirilən edamlarla bağlı Xomeyniyə açıq məktub yazıb və edamları tənqid edib. Ayətullah Xomeyni vəfat edəndən dərhal sonra Müntəziri canişinlikdən uzaqlaşdırılıb və onun yerinə İranın indiki dini lideri ayətullah Xamneyi gətirilib.
