 |
| Oqtay QORÇU |
Bir nömrəli terrorçu hesab edilən Bin Laden ələ keçirildiyi gün televiziyayla yayımlanan əməliyyatın bəzi detalları hələ də xatirimdədi. ABŞ ordusunun iştirakıyla hazırlanan bu antiterror əməliyyatını xüsusi təyinatlılar həyata keçirdilər. O gün bütün dünyanın gözü Pakistanda idi. “Əl-Qaidə” terror təşkilatının lideri Üsamə Bin Laden gizləndiyi evdə öldürüldü.
Minlərlə günahsız insanın qatili, bir neçə ölkədə törədilən terror aktının ideoloqu, ən nəhayət, radikal dinçi təfəkkürüylə islam dəyərlərinə hər zaman maddi və mənəvi zərbə vuran, sülhün, əmin-amanlığın şeytan boyda düşməni öldü. Maneə aradan götürüldü. Onun öldüyünü eşidincə bu xəbərə daha çox sevinənlər oldu. Ancaq yenə tərəddüd vardı. Bir neçə dəfə Bin Ladenin ölüm xəbəri yayılmışdı, ancaq hamısının şayiə olduğu məlum olmuşdu. Amma gözləyənləri rəsmilər gözü yolda qoymadılar.
Bütün bunlar bazar ertəsi, mayın 1-də, 2011-ci ildə baş verdi. Və mayın 2-də Ağ ev rəsmi açıqlama yayaraq Bin Ladenin öldürüldüyünü təsdiqlədi. Əməliyyatın bəzi detalları və fotolar ictimaiyyətə açıqlandı. Təsəvvürlər dəyişdi, Bin Laden öz ölümüylə həm də yaratdığı obrazına bir daha kənardan tamaşa etmək imkanı qazandırdı. O, möminlərin sırasında olmayıb, heç məğlubedilməz də deyildi, Bin Laden, sadəcə, dünyanı cəhənnəm libasında görmək istəyən birisi idi.
Ehtimallara görə, anlayıb ki, düşmənə atəş açmaq yersizdi, tez qaçmağı düşünürmüş. Yəqin Bin Laden macalı qismətin qarşısında diz çökdürmək istəyirmiş. Bir neçə dəfə qurtulduğundan sanırmış ki, bu onun yaratdığı taledi. Ancaq planı pozulub, taleyi tar-mar olub. Pakistandakı sığınacağında öldürülən Bin Ladenin rəhbərliyi dövründə “Əl-Qaidə”nin keçirdiyi müxtəlif terror aktları zamanı 10000 nəfərdən çox insan qətlə yetirilib.
Bin Laden insan cəlladı idi. Onun terror fəaliyyəti tək ABŞ-a, Avropa ölkələrinə deyil, həm də müsəlman dövlətlərinə qarşı yönəlmişdi. Daha Bin Laden boyda problem yoxdur. “Əl-Qaidə”nin terrorçularıyla mübarizə isə hələ də davam edir. Amerika və Avropa cəmiyyətinin, mədəniyyətinin həmişə əxlaqa, mənəvi dəyərlərə böyük zərbə vurduğunu deyən Bin Ladenin heyrət doğuran vəsiyyətnaməsi üzə çıxdı. Bu vəsiyyət Qərb dəyərlərinə düşmən kəsilən Üsamə Bin Ladenindi. Doğmalarına əmin-amanlıqda, özü də Avropada, ABŞ-da yaşamağı tövsiyə edən bir cəlladın lap xeyir-duasına bənzəyir. Və Bin Laden kitab kimi açılır. Sanki onun gələcəyə arzusu, qorxusu və tutduğu yanlış yol hər kəlmənin canına hopub.
“Böyük şər” adlandırdığı Amerikaya, xristian dünyasına cihad elan edən terrorçu vəsiyyətini həlak olmazdan az öncə yazıb. Bin Laden övladlarının, nəvələrinin Qərbə, demokratik ölkələrin birinə köçüb yaşamalarını tövsiyə edib. O, cavanların nüfuzlu universitetlərdə təhsil almasını arzulayıb və qətiyyətlə onlardan cihada qoşulmamağı tələb edib. Terrorçu vəsiyyətində belə yazır: ”Oxuyun, Qərb elminə yiyələnin. Mənim kimi olmayın”.
Bin Ladenin qayını Zəkəriyyə əl-Sabah da “Sunday Times” qəzetinə müsahibəsində bu fikri təsdiqləyib: ”O, uşaqlara ABŞ və Avropaya gedərək təhsil almağı, cihadla məşğul olmamağı tapşırdı”.
Bin Laden hansı ideyaya qulluq etdiyini, bütün ilahi qanunları tapdadığını anlayırdı. Terrorçu dinçi deyil, minlərlə insanın qatili olduğunu yaxşı bilirdi. Qəribədi, amma yenə bu şər ömrünün sonunadək cəhənnəmə döndərmək istədiyi Avropaya, Amerikaya öz doğmalarını əmanət etməyi düşünürmüş.
İnsanların, qanunların qorunduğu Qərb cəmiyyətinə, yaşam tərzinə yaxşı bələd olan Bin Laden onun törətdiyi əməllərə görə kiminsə güllələnəcəyinə yaxud dar ağacına yollanacağına inanmadığından...
Hətta özündən savayı heç kimə inanmayan terrorçu bu sayaq sülh arzulayıb və bu qədər əmin-amanlığı dəyərləndiribsə...
Heyrətlənmirəm, çünki əmin-amanlıq özü elə ən böyük dəyərdi.
