 |
|
Eyyub HACIYEV hajiyev@gmail.com |
Əziz müəllimim!
Bir az gec də olsa, Sizi doğum gününüz münasibəti ilə təbrik etmək istərdim. Hər bir insanın həyatında mühüm rol oynamış, ona doğru yol göstərmiş və həyatını dəyişmiş bir neçə şəxs olur. Mənim üçün bu şəxslərdən ən başlıcası Sizsiniz! Sizin yetişdirdiyiniz, təhsil verdiyiniz və həyat yolu öyrətdiyiniz yüzlərlə tələbənizdən biri olduğum üçün fəxr edirəm.
Rafiq müəllim, Sizinlə tanışlığımın çox qeyri-adi tarixi var. Hələ 1999-cu ildə Azərbaycan Dövlət Neft Akademiyasının (ADNA) iqtisadiyyat fakültəsinin bakalavr pilləsini bitirərək fakültədə magistr pilləsində təhsilimi davam etdirmək fikrindən imtina edəsi oldum. Rüşvət verməyi və tanışlıqla qiymət yazdırmağı öz ləyaqətimə sığışdırmadığım üçün iqtisadiyyat fakültəsində dözülməz əziyyətlərlə qarşılaşmalı olurdum. Bu cür müəllim və tələbə münasibətlərindən bezdiyim və təhsilin səviyyəsi məni qane etmədiyi üçün fakültə ilə vidalaşmalı oldum.
Təhsilimi davam etdirmək ümidimin hər yandan üzüldüyü bir vaxtda ADNA-nın avtomatlaşdırma kafedrasında müasir təhsil sistemli yeni biznesin idarə edilməsi - MBA proqramının açıldığını eşitdim. Düzü, proqrama ilk dəfə üz tutanda ümidim böyük deyildi. Amma Sizin idarə etdiyiniz təhsil proqramında tələbələrə göstərilən bərabər hüquqlu və insani münasibət elə ilk tanışlıqdan aydın idi.
Sizin rəhbərlik etdiyiniz təhsil sisteminin çox nailiyyətindən danışmaq olar. Rüşvətsiz və korrupsiyasız tədris, qarşılıqlı hörmətə əsaslanan müəllim-tələbə münasibətləri, ABŞ-ın Corciya Dövlət Universitetindən mütəmadi gələn beynəlxalq səviyyəli müəllim və professorlar, ABŞ-da təcrübə keçmiş müəllim heyəti, tədris üçün lazım olan hər cür avadanlıq və vəsaitlər və sair. Amma bizim Sizdən öyrəndiyimiz tək beynəlxalq səviyyəli təhsil deyildi. Biz Sizdən həm də həyat üçün ən vacib digər dəyərlər - ləyaqət, insani münasibətlər, sadəlik öyrəndik.
Əziz müəllimim, Sizin tələbəyə göstərdiyiniz münasibət, onlara dəstək olmaq istəyiniz, onların təhsilinə verdiyiniz dəyər və şəxsiyyətinə qoyduğunuz hörmət bizim bir mütəxəssis kimi yetişməyimizdə əsas rol oynadı. Siz bizə tək müəllim yox, həm də uzaqdan gələn bir işıq, gələcəyə ümid oldunuz.
Sizin verdiyiniz təhsil sayəsində 2003-cü ildə dünyanın ən məşhur universitetlərindən birinə - Nyu-Yorkdakı Kolumbiya Universitetinə daxil oldum. Bu münasibətlə keçirilən təqdimetmə mərasimində, tribunaya qalxarkən tədbirdə yüzlərlə insanın arasında Sizin də olduğunuzu gördüm. Sevincimin həddi-hüdudu yox idi. Elə tribunadan bu nailiyyətin Rafiq Əliyevin sayəsində olduğunu və özümün də Rafiq müəllimin yetişdirdiyi mütəxəssis olduğumu bildirdim. Bu zaman Sizin mənə fəxrlə baxmağınız mənə dünyalar qədər əziz idi. Düzü, Sizin öz tələbələrinizdən olan gözləntilərinizin bir hissəsini doğrultduğum üçün həyatımın ən xoşbəxt anlarından birini yaşayırdım.
Rafiq müəllim, Kolumbiya Universitetinə təhsilə başladıqdan sonra isə Sizin dünya şöhrətli alim olduğunuzun tam fərqinə vardım. Orada oxuduğum zaman bir çox tələbə yoldaşlarımın və müəllimlərimin Sizi tanıdığını ilk dəfə biləndə çox təəccübləndim. Sonra anladım ki, Sizin kitablarınız ABŞ-ın bir çox universitetində, elə Kolumbiya Universitetində də tədris sisteminə daxil edilib və Sizin təcrübəniz orda da öyrənilir.
Bu gün Azərbaycanın elə bir böyük biznes qurumu yoxdur ki, orada Sizin hazırladığınız kadrlar rəhbər vəzifədə çalışmasınlar. Bir çoxları da hazırda mənim kimi dünyanın müxtəlif şəhərlərində yaşayır. Hazırladığınız yüzlərlə mütəxəssisin biri kimi həyatda qazandığım hər bir nailiyyətə görə Sizə tam borcluyam. İstər öz professional fəaliyyətimdə, istər Azərbaycan üçün gördüyüm diaspor işlərində Sizdən öyrəndiyim prinsiplər - ədalət, səmimiyyət, insani münasibətlər və ən başlıcası Azərbaycana olan sevgi, vətənin maraqlarının hər şeydən üstün tutulmasını həmişə əsas götürməyə çalışdım.
Sizə 70 yaşınızda çox şey arzu etmək olar. Amma mənim Sizə arzum elə Sizin ürəyinizdə olan ən böyük Azərbaycan arzusudur. Gün o gün olsun Sizin ürəyinizdə tutduğunuz, ümidi ilə yaşadığınız Azərbaycan qurulsun. O vətən ki, orada güc və qüdrətin meyarı ədalətdir, inkişaf təhsil və elmə əsaslanır, ictimai münasibətlər isə insan ləyaqəti və dəyərlər üzərində qurulub.
Vankuver, Kanada,
11 fevral 2012-ci il
