Müsavat Divanının üzvü Vurğun Əyyub “Media forum” saytının suallarını cavablandırıb.
- Müsavatın növbəti başqanının kim olması məsələsində iki variant var. Bunlardan biri nizamnaməni dəyişib İsa Qəmbərə yenidən başqanlığa namizəd olmaq imkanı yaradılması, ikincisi isə nizamnaməni dəyişmədən yeni başqan seçməkdir. Hər iki variantın tərəfdarları və əleyhinə olanlar var. Sizcə, Müsavat hansı variantı seçməlidir?
- Hesab edirəm ki, İsa Qəmbər 2013-cü ilin prezident seçkisinədək Müsavat başqanlığında qalmaq arzusunu bildirsə və yaxud vəzifədən getmək fikrini dəyişsə, ona bu imkan yaradılmalıdır və mən bununla razıyam. Bununla bağlı mövqeyimi bir xeyli əvvəl bildirmişəm. Məsələ ondadır ki, bütün bu müzakirələri heçə endirən İsa Qəmbərin şəxsi mövqeyidir. Lap tutaq ki, qurultay nizamnaməni dəyişdi, amma öz namizədliyini irəli sürüb-sürməmək İsa Qəmbərin hüququdur. Əgər İsa bəy namizədliyini irəli sürməyəcəksə, onda bu qədər əziyyət nəyə lazımdır? Axı belə olanda nizamnamə dəyişikliyi, mübahisələr mənasız bir şeyə çevrilir. Ona görə də burada İsa Qəmbərin mövqeyi, demək olar, məsələnin hamısı deməkdir. Mənim yanaşmamam bundan ibarətdir.
Amma İsa Qəmbərin başqanlıqdan gedəcəyi təqdirdə partiyanın zəifləyəcəyi, dağılacağı haqda deyilənləri bölüşmürəm. Ola bilər ki, partiyadan kimlərsə istefa versin, başqaları passiv fəaliyyətə keçsin. Ancaq bunu bütövlükdə Müsavatın dağılması və ya zəifləməsi kimi qiymətləndirmək yanlışdır, bəzi hallarda isə bu, heç də məsələlərə obyektiv baxış və dost münasibətindən irəli gəlmir.
- Müsavatın Mərkəzi Nəzarət-Təftiş Komissiyası nizamnaməni dəyişdirmədən qurultayın keçirilməsini, amma başqan seçkisinin növbəti qurultayadək təxirə salınmasını təklif edib. Bunu mümkün sayırsınızmı?
- Belə bir məsəl var ki, yüz dərənin ağzını bir bərə kəsir. Yüz variant təklif etmək olar. Amma İsa Qəmbər fikrindən dönməyibsə, bunları müzakirə etməyin bir mənası qalmır.
- Müsavat başqanının müavini Mehman Cavadoğlu başqan səlahiyyətlərini Divan üzvlərinin rotasiya ilə gerçəkləşdirməsini təklif edib...
- Hər bir təklif müzakirə edilmək hüququna malikdir və müzakirə oluna bilər. Amma dünyada belə bir təcrübənin olması mənə bəlli deyil, bəlkə başqaları bilir. Azərbaycan şəraitində və indiki məqamda partiyanın rotasiya yolu ilə idarə edilməsini təsəvvürümə gətirmirəm. Bundansa, elə partiyada başqan vəzifəsini ləğv etmək olar. Partiyanın kollegial orqanı olan Divan var və Müsavatı bu qurum idarə edə bilər. Hər iclasa Divan üzvlərindən biri sədrlik edər və qərarları ictimaiyyətə çatdırar. Bu təkliflərin reallığa nə dərəcədə uyğun ola biləcəyini ciddi şəkildə müzakirə etmək lazımdır.
- Müsavat Partiyası Mərkəzi İcra Aparatının rəhbəri Arif Hacılı həbsxanadan partiyadaşlarına müraciət edib. Arif bəy hesab edir ki, nizamnamənin dəyişdirilib-dəyişdirilməməsi müzakirələri yekunlaşmalıdır. Deyir ki, bu müzakirələr partiyaya ziyan vurur...
- Arif bəyin narahatlığını anlayıram, müəyyən məqamlarını bölüşürəm. Amma müzakirələrə də qadağa qoya bilmərik. Partiyanın hər bir üzvünün istənilən məsələni müzakirəyə çıxarmaq hüququ var. Hesab etmirəm ki, bu müzakirələr partiyanı zəiflədir, parçalayır, düşmən dəyirmanına su tökür. Hər dəfə belə müzakirələr olanda, nizamnamədə demokratik dəyişikliklər edilməsi zərurəti ortaya çıxanda, demokratik tələbləri yerinə yetirmək lazım olanda partiyanın zəifləyəcəyi, dağılacağı haqda fikirlər eşidirik. Ancaq hər belə müzakirələrdən sonra Müsavat Partiyası daha da güclü olur. Yadımdadır, Müsavatın proqramı müzakirə olunanda eyni fikir səslənirdi. Nəzərə almaq lazımdır ki, son qərarı onsuz da müzakirələr, ayrı-ayrı şəxslər vermir, bu, ən ali orqan olan qurultayın səlahiyyətindədir.
- Ötən müsahibənizdə Arif Hacılının başqanlığa namizəd olmaq niyyətinə münasibət bildirəndə dediniz ki, Müsavata başqa xarakter və tipdə insan rəhbərlik etməlidir. Fikrinizi konkretləşdirə bilərsinizmi?
- Bu suala Müsavat Partiyasının qurultayında cavab verəcəm. Ona görə də cavabı qurultaya qədər gözləməli olacaqsınız. Müsavatda, partiya rəhbərliyində başqan olmağa layiq və hazır adamlar var. Amma indi ad çəkmək niyyətində deyiləm. Həmin şəxsin Vurğun Əyyub, yoxsa başqası olacağını zamanı gələndə açıqlayacam. Müsavat başqanı vəzifəsində görmək istədiyim şəxslə bağlı meyarlarım var. Mən daha çox həmin meyarlardan danışmışam. Bəzən sualların qoyuluşundan elə çıxır ki, hamı bir nəfəri dəstəkləməyə məcburdur. Dostlarımızın açıqlamalarını oxuyuram. Axı hələ heç kim namizədliyini irəli sürəcəyini qəti söyləməyib, hətta Arif bəy də.
- Bunu qurultaydan əvvəl açıqlayıb namizədinizin təbliğatı üçün istifadə etmək daha doğru olmazmı?
- Təbliğatın başqa yolları da var. Bunu digər prinsiplər üzərində qurmaq olar.
- 2006-cı ildə Müsavatda Məclis sədri postu yaradıldı və bu vəzifəni tutmaq üçün sizinlə Arif Hacılı arasında ciddi mübarizə getdi. Sonrakı mərhələdə bu mübarizə qarşıdurma və ittihamlara səbəb oldu. Sonda nə siz Məclis sədri ola bildiniz, nə də Arif Hacılı. Arif Hacılının başqan olmasını istəməməyiniz 2006-cı ildə olan intriqanın hələ də davam etməsi kimi qiymətləndirilə bilərmi?
- Əvvəla, intriqanı davam etdirmək deyəndə belə anlaşılır ki, əgər bu vardısa, onu mən başlamışam. Bununla razı deyiləm. Çünki mən partiya daxilində heç zaman intriqa tərəfdarı olmamışam və heç zaman intriqanın əsasını qoymamışam. İkincisi, mənim qərarımı yalnız bir hadisəyə bağlamaq düzgün deyil. Azərbaycanda müstəqil siyasətin başlandığı ilk illərindən bu prosesin içindəyəm. Siyasətlə məşğul olduğum qurumlarda həmişə rəhbərlikdə yer tutmuşam. Başqan məsələsində fikrimin formalaşmasında uzun illərin təcrübəsi, müşahidəsi böyük rol oynayıb.
İmdad ƏLİZADƏ
