 |
| Kamran Əliyev |
“İstintaq sirri olduğundan Orxan Kərimovun və onunla birlikdə təqsirləndirilən şəxslərin işi haqda danışmaq istəməzdim. Eyni zamanda burada insan hüquqları məsələsi var”. Baş Prokuror yanında Korrupsiyaya Qarşı Mübarizə İdarəsinin rəisi Kamran Əliyev yanvarın 27-də keçirdiyi mətbuat konfransında belə deyib.
“Sizcə, bir şöbə müdiri müavininin Təhsil Nazirliyində heç kimin xəbəri olmadan qanunsuz tələbə köçürməsi mümkündürmü” sualına Kamran Əliyev belə cavab verib: “Orxan Kərimov və digərlərinin işi üzrə istintaq yekunlaşıb. Hazırda istintaq materialları ilə tanışlıq prosesi gedir. İş yaxın vaxtlarda məhkəməyə göndəriləcək. Hər şey məhkəmədə bəlli olacaq. İstintaq yalnız toplanmış sübutlar əsasında qərar qəbul edib və bundan sonra da belə olacaq”.
Kamran Əliyev “Media forum” saytının əməkdaşının rüşvət və korrupsiyaya qarşı mübarizə zamanı yalnız kiçik rütbəli məmurların cəzalandırıldığı, onların arasında daha yüksək vəzifəli şəxslərin niyə olmadığı haqda sualını da cavablandırıb. İdarə rəisi bildirib ki, Azərbaycanda korrupsiya və rüşvətə qarşı aparılan mübarizə kampaniya xarakteri daşımır, sistemli formada həyata keçirilən dövlət siyasətidir: “Biz yalnız istintaqın əldə etdiyi sübutlar əsasında qərar qəbul edirik. Korrupsiya və rüşvətlə məşğul olan kifayət qədər yüksək vəzifəli şəxslər həbs olunub və mühakimə edilib”.
Orxan Kərimov 2011-ci il iyunun 6-da həbs olunub. O, Bakı İstintaq Təcridxanasında saxlanır. Cinayət Məcəlləsinin 308 (vəzifə səlahiyyətlərindən sui-istifadə ) və 311-ci (rüşvət alma - passiv rüşvətxorluq) maddələri ilə ittiham olunan Orxan Kərimova qarşı 2012-ci ilin yanvarında külli miqdarda rüşvət alma və təkrar rüşvət alma bəndləri ilə yeni ittiham da irəli sürülüb.
