Yanvarın 25-də Müsavat Partiyası başqanının müavini Mehman Cavadoğlu “Media forum” saytının suallarını cavablandırıb.
- Müsavat Partiyasının qurultayına hazırlıq necə gedir? Qurultayı elan olunduğu vaxtda - martda keçirmək mümkün olacaqmı?
- Marta az qalır. Rayon və şəhər təşkilatlarının bir hissəsində qurultaya hazırlıq konfransları keçirilməyib. Amma indiyədək baş tutan konfranslar qurultayın keçirilməsinə imkan verir. Yerli təşkilatların əksəriyyətində konfranslar olub. Amma qurultayın bütün yerli strukturlarda konfranslar keçirildikdən sonra baş tutması yaxşı olar.
Proses davam edir. Mümkün variantlardan biri də qurultayın vaxtının dəyişdirilməsidir. Ola bilər ki, qurultay başqa vaxta keçirilsin. Bu yalnız konfransların başa çatmaması ilə bağlı deyil. Bir sıra məsələlər var ki, onlara tam aydınlıq gətirilməlidir.
- Hansı məsələləri nəzərdə tutursunuz?
- Müsavatın nizamnaməsinə görə, partiyaya yeni başqan seçilməlidir. Hazırda qüvvədə olan nizamnamə bir şəxsə dalbadal iki dəfədən artıq başqan seçilmək hüququ vermir. Bu müddəa qəbul olunandan sonra İsa Qəmbər iki dəfə başqan seçilib. İsa bəyin yenidən başqan seçilmək hüququ yoxdur. Amma fakt ondan ibarətdir ki, partiyada böyük əksəriyyət İsa Qəmbərin başqanlığa davam etməsində maraqlıdır. Əksəriyyət hesab edir ki, indi ölkədə çox mürəkkəb və məsuliyyətli vəziyyət yaranıb, bu durumda indiyə kimi partiyanı uğurla idarə etmiş bir şəxsin başqanlıqdan getməsi müəyyən fəsadlar yarada bilər.
- İsa bəyin başqanlıqda qalmasının hansısa variantını görürsünüzmü?
- İsa Qəmbərin Müsavat başqanlığında qalmasını nəzərdə tutan variantlardan birini partiyanın Mərkəzi Nəzarət-Təftiş Komissiyası irəli sürüb. Komissiya nizamnamədə heç bir dəyişiklik etmədən və nizamnaməni pozmadan yaranmış vəziyyətdən çıxmağın mümkün olmasına rəy verib. Komissiyanın hazırladığı təklifə əsasən, Müsavatın qurultayı elan olunan vaxtda keçirilir, bir çox mühüm məsələləri həll edir, partiyanın Məclisinə, Mərkəzi Nəzarət-Təftiş Komissiyasına seçkilər keçirilir. Qurultayın qərarıyla başqan seçkisi təxirə salınır və yeni başqanın seçilməsi növbəti qurultaya saxlanılır.
Bu təklif hazırda partiya daxilində geniş müzakirə edilir. Partiya üzvlərinin, fəallarının əksəri təklifi maraqla qarşılayır. Hesab edirəm ki, yaranmış vəziyyətdən çıxmağın ən əlverişli yollarından biri də budur.
- Mərkəzi Nəzarət-Təftiş Komissiyasının təklifinə qurultaya hazırlıq üzrə təşkilat komitəsində baxılıbmı? İsa Qəmbər yeni təkliflə razıdırmı?
- Şəxsən mən İsa Qəmbərin bu təklifə münasibətinin necə olduğunu bilmirəm. İstənilən təklif qurultaya hazırlıq üzrə təşkilat komitəsində müzakirə olunur. Yəqin ki, bu təklifə də baxılacaq. İsa bəy dəfələrlə bildirib ki, yenidən başqanlığa namizədliyini irəli sürməyəcək, hətta qurultay nizamnaməni dəyişsə də, namizəd olmayacaq. O, mövqeyini dəyişməsə, atılan bu cür addımların heç bir səmərəsi olmayacaq. Belə olan halda isə vəziyyətdən çıxmaq və problemlərin yaranmaması üçün daha münasib təkliflər üzərində dayanmaq lazım gələcək.
- Məsələn...
- Bir təklif var ki, nizamnamə dəyişdirilsin və İsa bəyin üçüncü dəfə başqanlığa namizəd olmasına şərait yaradılsın. Amma İsa Qəmbər namizədliyini irəli sürməsə, nizamnamə dəyişikliyi əhəmiyyətini itirəcək. Əgər qurultay başqan seçkisinin keçirilməməsinə və bunun növbəti qurultayadək təxirə salınmasına qərar versə, onda qurultayın iradəsi daha üstün ola və İsa Qəmbərin rəyi nəzərə alınmadan qərar verilə bilər. Mərkəzi Nəzarət-Təftiş Komissiyasının təklifini cəlbedici edən də məhz bu məqamdır.
- Əgər başqan seçkisi təxirə salınmasa, prosesin sonrakı gedişini necə görürsünüz?
- Təbii ki, bu təklifin qəbul olunması problemin həlli olardı və buna çalışmaq lazımdır. Əgər bu variant alınmasa, şübhəsiz ki, yeni başqan seçiləcək. Mənim bu barədə təklifim var və həmin təklifi artıq mətbuatda səsləndirmişəm. Əgər başqan seçkisinin növbəti qurultaya saxlanması məsələsi alınmasa, başqan seçilməsi qaçılmaz olsa, onda daha səmərəli variantlar var və onları tətbiq etmək mümkündür. Struktur dəyişiklikləri edilərək rotasiya üsulu ilə həyata keçirilən başqanlıq institutu yaratmaq olar. Yəni növbəti qurultayadək başqanlıq funksiyası Divan üzvləri və yaxud sədrliyə iddialı olaraq ən çox səs alan bir neçə nəfər arasında əvəzetmə yolu ilə həyata keçirilə bilər. Altı ay bir nəfər, bundan sonra başqası başqan ola bilər. Təklif prinsipcə qəbul edilsə, detalları işləmək olar. Belə təcrübə dünya praktikasında var və bu həm də demokratiya yolunda irəliyə addım olar.
İkincisi, hesab edirəm ki, Müsavat başqanının seçilməsi səlahiyyətini qurultaydan alıb Məclisə vermək olar. Bu da indiki şəraitdə ölkədə parlament idarəçiliyinə keçidin zəruriliyi haqqında tez-tez səslənməyə başlayan təkliflər fonunda çox cəlbedici görünərdi. Müsavat Partiyası həmişə cəmiyyətimizə yeni demokratik ideyalar verən və bu ideyaları öz əməli fəaliyyətində tətbiq edən bir təşkilat olub. Ona görə də belə yeniliklərdən qorxmaq lazım deyil.
- Bir neçə müsavatçı başqanlığa namizəd olacağını açıqlayıb. Onlar İsa Qəmbərin fəaliyyətindən narazı olduqlarına görə namizədliklərini irəli sürüblər, yoxsa onun yenidən namizəd olmayacağını elan etməsi burada əsas rol oynayıb? Namizəd olmaq istəyən şəxslər başqan seçkisinin təxirə salınmasıyla razılaşacaqlarımı?
- Bütün müsavatçılar, eləcə də başqanlığa iddialı olanlar İsa bəyin partiyanın başqanı vəzifəsindən getməsində maraqlı deyillər. Nizamnamə ilə İsa bəyin yenidən seçilmək hüququ olsaydı, onların heç biri namizədliyini irəli sürməyəcəkdi. İddialı şəxslərin heç biri İsa Qəmbərdən narazı deyil.
İmdad ƏLİZADƏ
