 |
Yanvarın 24-də Milli Məclisin deputatı, “Azərbaycan” qəzetinin baş redaktoru Bəxtiyar Sadıqov “Media forum” saytının suallarını cavablandırıb.
- Rəsmi dövlət qəzeti olan “Azərbaycan”ın 22 və 24 yanvar saylarında İranın Azərbaycanla bağlı siyasətini kəskin tənqid edən iki məqalə dərc olunub. Bu yazılar Azərbaycan dövlətinin rəsmi mövqeyini əks etdirir, yoxsa jurnalist və ya redaksiya mövqeyidir?
- İran bizim yaxın qonşumuzdur. “Azərbaycan” qəzetində dərc olunan yazılarda da dönə-dönə vurğulandığı kimi, ortaq nöqtələrimiz çoxdur. Təəssüf ki, Azərbaycan iqtidarının və xalqının İrana münasibətdə göstərdiyi səmimiyyəti, isti münasibəti biz İranın rəsmi dairələrindən görmürük. Xüsusən son dövrlərdə İranda ayrı-ayrı ayətullahların, generalların səsləndirdiyi açıqlamalarda, bəyanatlarda Azərbaycanın ünvanına əsası olmayan fikirlər yer alır. Bəzi hallarda birbaşa Azərbaycanın daxili işlərinə qarışmağa edilən çağırışlar var.
Təbii ki, dövlətlərarası münasibət olduğuna görə biz rəsmi qəzet olaraq bu məsələlərə qarışmamışıq, münasibət bildirməmişik. Bunu diplomatların öhdəsinə qoymuşuq. Amma Azərbaycan Respublikası Milli Təhlükəsizlik Nazirliyinin bu yaxınlarda ifşa edərək qarşısını aldığı bir təxribatın, yəni Azərbaycanda yaşayan xarici mənşəli iki ictimai xadimin qətlə yetirilməsi üçün hazırlanmış plan və bu planın arxasında İranın xüsusi xidmət orqanlarının dayanması, bunun Azərbaycan vətəndaşlarının əli ilə Bakıda törədilməsinə cəhd göstərilməsi ilə bağlı açıqlaması faktlara və sübutlara əsaslanır.
Biz həm MTN-in bu informasiyasını qəzetdə işıqlandırdıq, həm də bütün televiziya kanallarında həmin təxribat planının iştirakçıları hadisə ilə bağlı açıq şərh verdilər. Hər kəs gördü və şübhə yeri qalmadı ki, həqiqətən də bu, İran xüsusi xidmət orqanlarının dəstəklədiyi, maliyyələşdirdiyi, silah-sursatla təmin etdiyi növbəti təxribat-terror planıdır.
Ona görə biz öz qəzetimizdə bu hadisəyə münasibət bildirməyi qərara aldıq. Çünki biz də bu ölkənin vətəndaşlarıyıq, öz vətənimizi sevirik. İran xalqına nə qədər xoş münasibət bəsləsək də, heç zaman istəmərik ki, bizim dövlətdə hansısa bir əcnəbi vətəndaşa qarşı terror əməli törədilsin, Azərbaycanın imicinə xələl gətirən hadisə baş versin. Buna görə də həm bir vətəndaş kimi, həm də bir jurnalist kimi bu mövqeyi açıq bildirdik və açıq şəkildə yazdıq.
- İran ətrafında ciddi geosiyasi proseslər baş verir, ABŞ, Avropa İttifaqı bu ölkəyə sanksiyalar tətbiq edir. “Azərbaycan” qəzetinin İran haqqında tənqidi yazılarına bu proseslərin də təsiri varmı, yoxsa bu, İran-Azərbaycan münasibətlərində yaranan gərginlikdən doğan yazılardır?
- Bir daha vurğulamaq istəyirəm ki, İran Azərbaycana yaxın qonşu dövlətdir. Biz heç vaxt istəmərik ki, İranda müharibə olsun, sabitlik pozulsun. Bu hansısa formada Azərbaycana da mənfi təsir göstərə bilər. Ən azı müəyyən qaçqın ordusu yaranacaq, Azərbaycana çoxlu adam keçəcək və bu da bizim üçün əlavə, yəni müharibə vəziyyətində olan ölkədə yeni problemlər yarada bilər.
İstərdik ki, İranın indiki rəhbərliyi öz xalqının və dövlətinin mənafeyini düşünərək İrana xaricdən hər hansı hərbi müdaxilənin törədilməsinə imkan verməsinlər. İranın ətrafında yaranmış problemi danışıqlar, sülh yolu ilə həll etsinlər. Ona görə də biz bu məsələdə sülh tərəfdarıyıq, hadisələrin danışıqlar yolu ilə çözülməsini istəyirik. Bütövlükdə “Azərbaycan” qəzetində dərc olunan yazıları bu proseslərlə bağlamaq məntiqsizdir. Yəni bizdə belə bir niyyət ola bilməz.
- Yazıçı-publisist Rafiq Tağı qətlə yetiriləndə müstəqil ekspertlər, mətbuat, müxalifət partiyaları bu qətlin arxasında dayanan əsas qüvvə kimi İranı göstərdi. “Azərbaycan” qəzeti həmin dövrdə bu haqda, demək olar, heç nə yazmadı. İndi isə “Azərbaycan” qəzeti də Rafiq Tağının qətlinə görə İranı ittiham edir. Niyə indi bu haqda yazırsız?
- Rafiq Tağı qətlə yetiriləndə qəzetlər müxtəlif versiyalar irəli sürdülər. Mətbuat Rafiq Tağının ölümünü islam dininin daşıyıcısı olan insanın islama layiq olmayan yazısı ilə əlaqələndirdi. Yazdılar ki, İrandan onun ölümünə fətva verilib. O zaman, təbii, biz bu məsələyə qarışa bilməzdik. Çünki bütün bunlar söz-söhbət idi. Amma sonrakı dövrlərdə bu fikirlər iranlı ruhanilər tərəfindən səsləndirildi, xüsusən bizim yazımızda da qeyd olunduğu kimi, ayətullah Lənkərani özü fətva verdiyini qeyd etmişdi. Onun oğlu da atasının belə bir fətva verdiyini xatırlatdı və eyni zamanda bu hadisəyə sevindiyini bəyan etdi. Və artıq bu onların özləri tərəfindən təsdiq edildiyinə görə biz bu məsələyə yazılarda toxunmağı zəruri bildik.
Lakin diqqətlə baxılsa, görünər ki, biz orada həmin fikri hökm şəklində deməmişik ki, bu hadisə İran tərəfinin sifarişidir. Sadəcə, bu hadisənin İran tərəfinin sifarişi olması barədə gəzən söz-söhbətin bu ehtimallara meyli artırdığını xatırlatmışıq. Yazıda bu hadisənin İran tərəfindən icra edildiyini təsdiq edən formada heç nə deyilməyib.
- Rəsmi dövlət qəzetinin bu haqda yazdıqları ehtimallara əsaslanır, yoxsa sizdə hansısa məlumatlar var?
- Artıq qeyd etdim ki, yazılarda həm MTN tərəfindən ifşa olunmuş təxribat planı, ortada olan faktlar, həm də ki, İran mediasında və İran rəsmilərinin çıxışlarında yer alan fikirlər əsas götürülüb. Bizim üçün əsas budur. “Azərbaycan” qəzetinə hansısa qurum, orqan və ya kimlərsə heç kimə məlum olmayan nə dəlil və sübut, nə də fakt göndərib. Belə bir şey yoxdur. “Azərbaycan” qəzeti heç vaxt gizli mənbələrə istinad etmir. Ümumiyyətlə, o cür mənbələrdən bizə fakt daxil olmur. Praktikamızda belə bir şey yoxdur.
- Son məqalələr İran-Azərbaycan münasibətlərini daha da gərginləşdirə bilərmi?
- Diqqətlə fikir verəndə görünür ki, həmin məqalələrin həm ruhu, həm yazılış tərzi elə bil ki, yaxın dostundan inciyən, yaxın dostundan belə hərəkəti gözləməyən formada yazılıb. Yəni “sənə güvəndiyim dağlar, sənə də qar yağarmış”. Bu atalar sözünün ruhu var yazılarda.
Ermənistan tərəfindən işğal olunmuş bir rayondan seçilmiş millət vəkili olduğum üçün İranın bu hərəkətləri mənə xüsusilə ağır təsir edir. Çünki mənim vətənim Ağdam dağıdılıb, yerlə yeksan edilib! Ağdam “ruhlar şəhəri” siyahısına salınıb. Bu gün mənim bütün qohumlarım, doğmalarım məcburi köçkün həyatı yaşayırlar. Yaxınlarım, dostlarım, əzizlərim müharibədə şəhid olublar. Bu mənada dost saydığımız İran tərəfindən Ermənistana bəslənən münasibətlər müharibə acısını yaşamış insan kimi mənə çox ağır təsir göstərir. Hər dəfə Ermənistan prezidentinin İrana səfəri, İran prezidentinin Ermənistana səfəri, onların qucaqlaşması, hətta Dağlıq Qarabağ məsələsində də İranın Ermənistanın yanında olması məcburi köçkün rayonundan olan bir insan kimi məni artıq dərəcədə ağrıdır.
Amma indiyədək heç vaxt baş redaktoru olduğum qəzetdən tribuna kimi istifadə etməmişəm. Çünki biz həmişə çalışmışıq ki, İranla mehriban münasibətlərdə olaq. Azərbaycan iqtidarı daim İranla normal münasibətlər saxlayır. Ölkə rəsmlərinin bəyanatlarında hər zaman açıq şəkildə bildirilir ki, biz İrana xoş, mehriban, dost və qardaş münasibəti bəsləyirik. İstəmərik ki, münasibətlərimiz korlansın. Hərçənd İran tərəfi bizə eyni münasibəti göstərmir.
Bu yaxınlarda Prezident Administrasiyasının şöbə müdiri cənab Əli Həsənov İrana səfər etdi. Həmin səfər zamanı çox mühüm danışıqlar aparıldı, İranın bəzi televiziya kanallarında və KİV-lərində yer alan anti-Azərbaycan çıxışlar, Azərbaycana qarşı dost olmayan münasibətin ortaya qoyulması, Azərbaycanın daxili işlərinə qarışılması müzakirə olundu. Böyük ümidlər var idi ki, artıq bu məsələlərə son qoyulacaq, İran tərəfi də Azərbaycanla münasibətlərə həssaslıqla yanaşacaq. Amma təəssüf ki, gözləntilər özünü doğrultmadı. Yenidən həmin hərəkətlər davam edir.
Təbii ki, Azərbaycan İranla münasibətlərin gərginləşməsini istəmir və buna doğru heç bir addım atmayacaq. Biz heç vaxt istəmərik ki, yaxın qonşumuz, din, dil qardaşımız, bu ağır günümüzdə bizə arxa durmalı olan dövlətlə münasibətlərimiz pis olsun. Azərbaycan dövlətinin də, iqtidarının da, hər bir azərbaycanlının belə bir niyyəti və istəyi yoxdur. Bunu həm də İran tərəfi istəməlidir.
İmdad ƏLİZADƏ
