Hüquqşünas Yalçın İmanov hesab edir ki, yazıçı Rafiq Tağıya qəsd Cinayət Məcəlləsinin 29-120-ci maddəsi ilə araşdırılmalıdır: “Rafiq Tağını bıçaqlayan şəxsin niyyəti ona xəsarət yetirmək olmayıb. O, yazıçını öldürmək istəyib. Bu baxımdan cinayət əməlinin qəsdən sağlamlığa ağır zərər vurma kimi tövsif olunması yanlışdır. Bu əməl qəsdən adam öldürməyə cəhd kimi tövsif olunmalı və istintaq bu yöndə aparılmalıdır”.
2011-ci il noyabrın 19-da yazıçı Rafiq Tağı Bakıda bıçaqlanıb. Noyabrın 23-də yazıçı müalicə olunduğu Kliniki Tibbi Mərkəzdə vəfat edib. Yazıçıya qəsd Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə araşdırılır. İstintaqı Baş Prokurorluğun Ağır Cinayətlərə Dair İşlər üzrə İstintaq İdarəsi aparır.
Cinayət Məcəlləsinin 126.1-ci maddəsinə görə, qəsdən sağlamlığa ağır zərər vurma üç ildən səkkiz ilədək müddətə azadlıqdan məhrumetmə ilə cəzalandırılır.
Yalçın İmanov isə hesab edir ki, Rafiq Tağıya qəsdin istintaqını yazıçının hücumdan sonra həyatını itirməməsinə əsaslanıb qəsdən sağlamlığa ağır zərər vurma maddəsi ilə araşdırmaq düzgün seçim deyil: “Yazıçı ona hücum edən şəxsin iradəsindən asılı olmayaraq sağ qalıb. Rafiq Tağıya çoxlu bıçaq zərbəsi vurulub. Yazıçı Kliniki Tibbi Mərkəzə döş qəfəsi və qarında çoxsaylı deşilmiş-kəsilmiş yaralar və kəskin qanaxma ilə gətirilib. Əməliyyat saatlarla çəkib, yazıçının dalağı çıxarılıb. Digər orqanların da ağır xəsarət alması sonda fəsadlara gətirib və Rafiq Tağı noyabrın 23-də vəfat edib. Yəni sui-qəsdçinin niyyəti Rafiq Tağını öldürmək olub və onun əməli adam öldürməyə cəhd kimi tövsif olunmalıdır”.
Cinayət Məcəlləsindən çıxarış:
Maddə 29. Cinayət etməyə cəhd
Bilavasitə cinayət törətməyə yönəldilmiş qəsdən edilən əməl (hərəkət və ya hərəkətsizlik), şəxsin iradəsindən asılı olmayan səbəblərə görə başa çatdırılmamışdırsa, cinayət etməyə cəhd hesab olunur.
Maddə 120. Qəsdən adam öldürmə
120.1. Qəsdən adam öldürmə, yəni digər şəxsi qəsdən həyatdan məhrum etmə - yeddi ildən on iki ilədək müddətə azadlıqdan məhrum etmə ilə cəzalandırılır.
120.2. Qəsdən:
120.2.1. bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən adam öldürmə;
120.2.2. xuliqanlıq niyyəti ilə adam öldürmə;
120.2.3. zərərçəkmiş şəxsin xidməti vəzifəsini və ya ictimai borcunu yerinə yetirməsi ilə əlaqədar onun özünü və ya yaxın qohumlarını öldürmə;
120.2.4. xüsusi amansızlıqla və ya ümumi təhlükəli üsulla adam öldürmə;
120.2.5. tamah məqsədi ilə və ya sifarişlə, habelə zərərçəkmiş şəxsin orqanlarından və ya toxumalarından istifadə etmək məqsədi ilə adam öldürmə;
120.2.6. başqa cinayəti gizlətmə və ya onun törədilməsini yüngülləşdirmə məqsədi ilə, habelə zorlama və ya seksual xarakterli başqa zorakı hərəkətlərlə əlaqədar adam öldürmə;
120.2.7. iki və ya daha çox şəxsi öldürmə;
120.2.8. təqsirkar şəxs üçün aşkar surətdə hamilə vəziyyətində olan qadını öldürmə;
120.2.9. təqsirkar şəxs üçün aşkar surətdə köməksiz vəziyyətdə olan adamı öldürmə, habelə adam oğurluğu və ya girov götürülməsi ilə bağlı adam öldürmə;
120.2.10. təkrar adam öldürmə;
120.2.11. quldurluq, hədə-qorxu ilə tələb etmə, terrorçuluq və ya banditizmlə əlaqədar adam öldürmə;
120.2.12. milli, irqi, dini ədavət və ya düşmənçilik niyyəti ilə adam öldürmə - on iki ildən on beş ilədək müddətə azadlıqdan məhrum etmə və ya ömürlük azadlıqdan məhrum etmə ilə cəzalandırılır.
