Azərbaycanın hüquq müdafiə qurumları kimləri siyasi məhbus sayır?
Hüquq Müdafiə Təşkilatları Monitorinq Qrupunun üzvü Səidə Qocamanlı (bu qurumda Novella Cəfəroğlu və Çingiz Qənizadə də təmsil olunur) “Media forum” saytına deyib ki, hazırda bu qurumun siyasi məhbus saydığı 27 şəxs var. Onların 13-ü 2 aprel mitinqinə görə həbs olunan şəxslərdir: Müsavat Partiyasının üzvləri Arif Hacılı, Tural Abbaslı, Ülvi Quliyev, Əhəd Məmmədli, Rüfət Hacıbəyli, Elşən Həsənov; AXCP üzvləri Məhəmməd Məcidli, Elnur Məcidli, Sahib Kərimov, Arif Alışlı, Zülfüqar Eyvazlı, Babək Həsənov, Elnur İsrəfilov.
Qurum 2011-ci ildə məhkum olunmuş daha 4 nəfəri siyasi məhbus sayır: gənc fəallar Cabbar Savalanlı, Bəxtiyar Hacıyev, AXCP üzvü Şahin Həsənli, hüquq müdafiəçisi Vidadi İsgəndərli.
Hüquq Müdafiə Təşkilatları Monitorinq Qrupunun siyahısında əvvəlki illərdə həbs olunmuş daha 10 nəfərin adı var: “Yeni Fikir” Gənclər Təşkilatının sədri Ruslan Bəşirli, sabiq səhiyyə naziri Əli İnsanov, sabiq iqtisadi inkişaf naziri Fərhad Əliyev, iş adamı Rafiq Əliyev, Xüsusi Təyinatlı Polis Dəstəsinin komandirlərindən olmuş Dəyanət Kərimov, sabiq XTPD-çi Şəmsi Abdullayev, sabiq XTPD-çi Nizami Şahmuradov, XTPD işinə görə həbs olunmuş Mehman Məmmədov, iş adamı Şəmsi Səmədzadə, İranla əlaqəyə görə tutulmuş Telman İsmayılov.
İnsan Hüquqlarını Müdafiə Mərkəzinin (rəhbəri Eldar Zeynalov) siyasi məhbus saydığı şəxslərin siyahısını əldə etmək mümkün olmasa da, “Media forum” saytı dəqiqləşdirib ki, bu qurum xalq hərəkatı fəalı Nemət Pənahlını və 2011-ci ildə azadlıqdan məhrumetmə cəzasına məhkum olunan islamçı kəsimin təmsilçilərini də siyasi məhbus sayır. Bunlar ruhanilər Azər Cəbiyev, Fəxri İlyasov, Azərbaycan İslam Partiyasının (AİP) lideri Mövsüm Səmədov, AİP Astara rayon təşkilatının sədri Rufulla Axundzadə, AİP sədrinin müavini Vaqif Abdullayev, ruhani Fəramiz Abbasov, Mövsüm Səmədovun qayını Firdovsi Məmmədrzayev, Mövsüm Səmədovun əmisi oğlu Dəyanət Səmədovdur.
İnsan Hüquqlarını Müdafiə Mərkəzinin siyahısında Hüquq Müdafiə Təşkilatları Monitorinq Qrupunun siyasi məhbus saymadığı digər şəxslərin də adlarının yer aldığı haqda məlumat var: Ağayev Fərid, Əliyev Ceyhun, Əliyev Rəşad, Əmiraslanov Elçin, Dadaşbəyli Səid, Qocayev Samir, Quliyev Bəybala, İdrisov Mikayıl, Mehbalıyev Emil, Kərimov Rasim, Kərimov Cahangir, Kazımov Arif, Poladov Səfa, Bədəlov Rövşən, Marqaşvili Xızır, Qurbanov Malik.
Sülh və Demokratiya İnstitutu (rəhbəri Leyla Yunus) əvvəllər və 2011-ci ildə həbs olunmuş bütün ictimai-siyasi fəalları, eləcə də islamçıları siyasi məhbus hesab edir.
Yenicə yaradılmış “İnsan Haqları Uğrunda” İctimai Birliyin rəhbəri Eynulla Fətullayev noyabrın 18-də “Media forum” saytına deyib ki, başçılıq etdiyi qurum siyasi məhbus siyahısı tərtib etməyib. O qeyd edib ki, hazırda Avropa Şurasının müvafiq qurumları siyasi məhbus meyarını dəqiqləşdirir. Hüquq müdafiəçisinin sözlərinə görə, yalnız meyar dəqiqləşəndən sonra təkmil siyahı hazırlamaq mümkündür.
