Gürcüstan parlamenti paytaxt Tbilisidən Kutaisi şəhərinə köçürülür. Bu, 2012-ci ildə baş verəcək. Azərbaycan parlamentinin də Bakıdan köçürülməsi – məsələn, Gəncəyə – mümkündürmü? “Media forum” saytı bu sualla “525-ci qəzet”in baş redaktoru Rəşad Məcidə, deputatlar İqbal Ağazadəyə və Aydın Mirzərzadəyə müraciət edib.
Bakının gündən-günə daha çox yükləndiyini vurğulayan Rəşad Məcid deyib ki, bir neçə dəfə ayrı-ayrı qurumların Azərbaycanın digər şəhərlərinə köçürülməsi təklifi ilə çıxış edib: “Bu təklifi bəzi millət vəkilləri və ictimai xadimlər də dəstəkləmişdilər. Paytaxtımız getdikcə iri meqapolisə çevrilir. Buna görə də Bakı ilə Gəncə arasında yeni paytaxtın yaradılması vacibdir. Bu həm də ölkənin dinamik inkişafına gətirib çıxarar. O vaxt bu fikrə müsbət reaksiya verənlər olsa da, təəssüf ki, nəticəsiz qaldı.
Biz bu barədə müzakirələr təşkil edəndə bir inşaat mütəxəssisi demişdi ki, Abşeron rayonuna 4 milyon əhali yerləşə bilər. Hazırda bu ərazidə həqiqətən də 4 milyona yaxın əhali yaşayır. Ona görə də mən paytaxtın köçürülməsini vacib məsələlərdən biri hesab edirəm. Bu mümkün deyilsə, heç olmasa bir neçə nazirliyi və universiteti başqa şəhərlərə köçürmək olar”.
İqbal Ağazadə də təkcə parlamentin yox, bütövlükdə paytaxtın başqa şəhərə köçürülməsi tərəfdarlarındandır: “Çünki Tiflisdə və Bakıda əhali sıxlığı eyni deyil. Azərbaycanda daha cəsarətli addımlar atılmalıdır. Yeni paytaxtın tikilməsi ilə bağlı qanun qəbul edilməlidir. Dövlətimizin buna imkanı çatar. Ermənistan və Azərbaycan arasındakı münaqişə dövlətimizin xeyrinə həll olunsa, yeni paytaxt kimi Ağdamı seçmək olar. Ağdam bütün parametrlərinə görə kifayət qədər optimal variantdır. Bununla istər təhlükəsizlik baxımından, istərsə də digər aspektlərdən dövlətimiz yeni mərhələyə qədəm qoymuş olar. Paytaxtın nə vaxt və hara köçürüləcəyini deyə bilmərəm, ancaq onu deyə bilərəm ki, Azərbaycan gec-tez bu mərhələni yaşayacaq”.
Aydın Mirzəzadə isə bəzi dövlət orqanlarının paytaxtdan başqa şəhərlərə köçürülməsinin əleyhinədir. Onun sözlərinə görə, elə problemlər var ki, dövlət orqanlarının nümayəndələri onları telefon, poçt və ya internet vasitəsilə ünsiyyət saxlamaqla həll edə bilməzlər, onları canlı müzakirə edib həll etmək lazımdır. Ona görə də Aydın Mirzəzadə hesab edir ki, hakimiyyət qollarından hər hansı birinin, o cümlədən parlamentin Bakıdan köçürülməsi doğru olmazdı: “Bakıdakı sıxlığı aradan qaldırmaq ucun bölgələrdə yeni müəssisələr və universitetlər açmaq lazımdır”.
Aysel YUSİFQIZI
