MİTİNQ HARDA KEÇİRİLMƏLİDİR? (Hörmətli oxucular, burada şərhinizi yaza bilərsiniz)

Bakıda hökumətin kütləvi aksiyalar üçün ayırdığı yerlərlə bağlı məsələ yenə gündəmdədir. Bu il ölkədə parlament seçkisi olacaq və sözsüz ki, siyasi qüvvələr, seçki blokları və seçkidə iştirak edəcək namizədlər kütləvi aksiyalar, mitinqlər keçirməyə də təşəbbüs göstərəcəklər. Ancaq müxalif qüvvələr və bir sıra vətəndaş cəmiyyəti institutları hökumətin ayırdığı yerləri mitinqlər üçün yararsız sayır və alternativ yerlər təklif edir. “Media forum” saytı hökumətin ayırdığı yerlərlə digər qüvvələrin təklif etdiyi alternativ yerləri oxucuların müzakirəsinə çıxarır. Sayt oxucuları məsələyə münasibət bildirməyə, öz düşüncələrini bir-biriləri ilə bölüşməyə dəvət edir.

Bakı Şəhər İcra Hakimiyyətinin mitinqlərin keçirilməsi üçün paytaxtın 11 rayonunda ayırdığı yerlər:
- Binəqədi rayonu - Binəqədi qəsəbəsi, 3-cü mədən, 120-ci korpusun yaxınlığında Binəqədi qəsəbə İdman-Sağlamlıq Kompleksinin stadionu;
- Səbail rayonu - 20-ci yaşayış sahəsi, Azərbaycan Respublikası Dövlət Neft Şirkətinin “Neftçi” İdman-Sağlamlıq Mərkəzinin “Bibiheybət” stadionu;
- Nəsimi rayonu - 20 Yanvar küçəsi, 21 b, 4-cü mikrorayonda məhəllə stadionu;
- Xətai rayonu - Naximov yaşayış massivi, 6a, 6b, Naximov yaşayış massivindəki meydança; Zığ yolu küçəsi, 18, Zığ yolu küçəsi, 29/22-ci məhəllənin qarşısındakı meydança;
- Qaradağ rayonu - Sahil qəsəbəsi, E.Quliyev küçəsi, Sahil qəsəbə stadionu;
- Sabunçu rayonu - Bakıxanov qəsəbəsi, Yavər Əliyev küçəsi, “Azneftgeofizika” trestinin qarşısındakı idman meydançası;
- Suraxanı rayonu - S.Bəhlulzadə küçəsi, 24, Azərbaycan Respublikası Dövlət Neft Şirkətinin “Neftçi” İdman-Sağlamlıq Mərkəzinin T.İsmayılov adına stadionu;
- Yasamal rayonu - M.Seyidov küçəsi, 3155-ci məhəllə, Yasamal rayon İdman-Sağlamlıq Kompleksinin stadionu;
- Əzizbəyov rayonu - Türkan qəsəbəsi, Xanlar küçəsi, Türkan qəsəbə parkının yanındakı meydan;
- Nizami rayonu - Q.Qarayev prospekti, “Təbriz” kinoteatrının qarşısındakı meydan;
- Nərimanov rayonu - Araz küçəsi, 4, “Ulduz” metro stansiyasının qarşısındakı meydan.

Müxalifət partiyalarının və bir sıra vətəndaş cəmiyyəti institutlarının təklif etdiyi alternativ yerlər:
- Səməd Vurğun bağı;
- Füzuli meydanı;
- “Nərimanov” kinoteatrı qarşısındakı meydan;
- Hüseyn Cavid bağı;
- Keçmiş “Qələbə” kinoteatrı qarşısındakı meydan və s.

Bundan başqa, etirazçı dairələr dövlət qurumlarının paytaxtda yerləşən mərkəzi binalarının, o cümlədən Bakı Şəhər İcra Hakimiyyətinin 200 metrliyində etiraz aksiyaları keçirməyə icazə istəyir. Onu da xatırladaq ki, istər xalq hərəkatı, istərsə də müstəqillik dövründə Bakıda Azadlıq meydanı, Sahil bağı, Motodrom, Ukrayna dairəsi kimi yerlərdə mitinqlər keçirilib.