 |
|
Təbrizin Əbureyhan körpüsü, 12 dekabr 2006. |
Güney Azərbaycanda milli hökumətin qurulmasına səbəb olmuş «21 Azər» (12 dekabr) hərəkatının 61-ci ildönümü münasibətilə dünən İranın müxtəlif şəhərlərində şənlik mərasimləri keçirilib, atəşfəşanlıqlar olub.
Azərbaycanlı milli fəallar Təbrizin Abresan,Yusifabad, Saatqabağı, Şahnaz, Tərbiyət, Rüşdiyə və başqa məhəllələrində göyə fişənglər atıb, tonqal yandırıb, avtomobillərdən yüksək səslə Azərbaycan musiqilərini səsləndiriblər.
Təbrizin Əbureyhan körpüsü üzərində isə milli fəllar Azərbaycan Respublikasının dövlət bayrağını dalğalandırıblar. Güney Azərbaycan İstiqlal Partiyasının araşdırma və mətbuat məsələləri üzrə məsulu Sadiq İsabəyli həmin məqamı əks etdirən fotoşəkilləri «Media forum» saytına təqdim edib.
Urmiya şəhərində də böyük atəşfəşanlıq olub. «21 Azər»in 61-ci ildönömü münasibətilə Urmiyanın mərkəzi meydanında, Müdərris meydanında, Madər, Meysəm, Zəncir, Sirus, Vəliəsr dairəvi meydanlarında, Beşyolda, İmam küçəsində, Hüseynabad məntəqəsində, Xəyyam küçəsində, Bazarağzında möhtəşəm şənlik mərasimləri keçirilib.
Milli fəallar gecə saatlarında Urmiyada göyə fişənglər atıblar, əhali arasında vərəqələr yayıblar. Gənclər avtomobillərin işığını yandırıb söndürə-söndürə, siqnal verə-verə şəhərin küçələrini dolaşıblar. «Media forum»a Güneydən verilən məlumata görə, gecə, demək olar, hamı şəhərdə bu təntənəyə qoşulub, çölə çıxıb göyə atılan fişəngləri sevinc nidaları ilə qarşılayıb.
Dünən Ərdəbil şəhərində də çox səs-küylü bir gecə yaşanıb. «Media forum»a Ərdəbildən gələn xəbərdə deyilir ki, şəhərin mənzərəsi çox gözəl olub. Azərbaycanlı gənclər göyə fişənglər atıblar. Gənclər siyasi məhbus Abbas Lisanini dəstəkləmək məqsədilə onun evinə doğru yürüş etmək də istəyiblər. Lakin mülki geyimdə olan təhlükəsizlik qüvvələrinin əməkdaşları buna imkan verməyib.
Germi və Xoy şəhərlərində də «21 Azər» qeyd edilib. Germinin Düldül qayasında bu ilin may-iyun hadisələri zamanı İranda həlak olan azərbaycanlı şəhidlərin ruhunu anmaq üçün böyuk tonqal qalanıb. Xoyda Azad Universitetin tələbələri əhali arasında «21 Azər»in ildönümü münasibətilə təbrik vərəqələri yayıblar.
Keçirilən tədbirlərdə «Haray, haray, mən türkəm», «Yaşasın Azərbaycan», «Ölüm olsun faşizmə, ölüm olsun şovinizmə!», «Mənim dilim ölən deyil, fars dilinə dönən deyil», «Türk dili rəsmi olsun», «Millətçi məhbuslara azadlıq» şüarları səsləndirilib.
