«Azadlıq» radiosu «Urmu News» saytına istinadən xəbər verir ki, minlərlə hərbçinin yerləşdirildiyi Sulduzda fövqəladə vəziyyət davam edir və yas mərasimində iştirak edən yüzlərlə insan nəzarət altına alınıb.
Azərbaycanlıları təhqir edən karikaturalara qarşı bir il bundan əvvəl keçirilən etirazlar Sulduzda polisin nümayişçilərə atəş açması və dörd nəfərin qətlə yetirilməsi ilə nəticələnmişdi.
22 may aksiyalarının ildönümü ilə bağlı Təbrizdə başlayan yeni etiraz dalğası ayın 23-ü və 24-də də davam edib. Mayın 22-də milli haqlarını tələb edən on minlərlə nümayişçinin keçirdiyi dinc yürüşlər təhlükəsizlik qüvvələrinin hücumu, iştirakçıların bəzisinin yaralanması və onlarla fəalın həbsi ilə nəticələndikdən sonra mayın 23-ü və 24-də etiraz əlaməti olaraq Təbriz bazarında alver dayandırılıb.
Təbrizdən verilən son məlumata əsasən, mayın 23-də polis bazarda apardığı yoxlama zamanı bir neçə gənci həbs etmək istəyib. Buna etiraz edən sakinlərlə polis arasında toqquşma olub. Yüzə yaxın insan zorla Təbriz həbsxanasına aparılıb.
Son üç gündə Təbrizdə tutulanların sayı haqda dəqiq məlumat yoxdur. İranın rəsmi orqanları 15 nəfər «xarici amilin» həbsi ilə 22 may aksiyalarına mane olduğunu iddia etsə də yerli nümayəndələr, o cümlədən Urmiyanın millət vəkili Təbrizdə tutulanların sayının bundan qat-qat çox olduğunu bildirir.
Mayın 22-də Təbriz telekanalının xəbərlərində məhbuslara qarşı heç bir işgəncə tətbiq olunmadığı bildirilib. Lakin «Amerikanın səsi» radiosuna müsahibə verən Barış Türkoğlunun sözlərinə görə, fəallara ailə üzvləri və vəkilləri ilə görüş imkanı verilmir və məhbəsdəki mənbələr şiddətli işgəncələr barədə xəbər verir.
Təbriz və Həmədan universitetində isə mayın 23-ü və 24-ü etirazlar davam edib və tələbələr arasında həbslərə etiraz olaraq yeni mitinqlərə çağırış vərəqələri paylanıb.
Urmiyada fövqəladə vəziyyətin davam etdiyi, fəalların iş yeri və evlərinin nəzarət altında olduğu bildirilir. Mayın 22-də Urmiya universitetinin tələbəsi və Ustad Şəhriyar tələbə ocağının rəhbəri Əkbər Paşayi həbs olunub. Paşayi universitetin təhlükəsizlik məmurları tərəfindən tutularaq ETTELAAT idarəsinə təslim edilib. Azərbaycan Məhbuslarını Müdafiə Komitəsi mayın 22-də yalnız Urmiyada 80 nəfərin həbs olunduğunu təxmin edir.
Qoşaçayda mayın 22-də tutulan 15 fəalın adı məlumdur. Onların hamısının mayın 24-də Urmiya həbsxanasına aparıldığı bildirilir.
Mövzu ilə əlaqədar bax:
TƏBRİZDƏ MİNLƏRLƏ İNSANIN İŞTİRAKI İLƏ AKSİYA KEÇİRİLİB. POLİS GÖZYAŞARDICI QAZDAN İSTİFADƏ EDİB
TƏBRİZ. 22 MAY 2007
22 MAY HADİSƏLƏRİNİN İLDÖNÜMÜ: URMİYA, QOŞAÇAY, SULDUZ, XOY, ZƏNCAN və QUMDAN XƏBƏRLƏR
22 MAY HADİSƏLƏRİNİN İLDÖNÜMÜ İLƏ ƏLAQƏDAR İSVEÇDƏ YAŞAYAN AZƏRBAYCANLILAR AKSİYA KEÇİRİBLƏR
HƏMƏDANIN İBN SİNA UNİVERSİTETİNDƏ 22 MAY HADİSƏLƏRİNİN İLDÖNÜMÜ İLƏ BAĞLI KEÇİRİLƏN AKSİYADAN ŞƏKİLLƏR
