 |
| ELKİN |
Yolda, parkda, məhəllədə, bir sözlə, heç yerdə hərəkət edə-edə içki içməyin. Əks təqdirdə pos-patrul xidmətinin əməkdaşları sizə yaxınlaşacaq...
Mənə bunu çox demişdilər. Amma inanmamışam. Polis qardaşlarımızın min cür oyunundan xəbərim olsa belə. İnanmırdım ki, məhz əlimdə pivə olduğuna görə polis məni saxlaya bilər.
Amma bu inamsızlığım dünənki gecənin qaranlığında əriyib getdi. Hava soyuq olsa da, ürəyimdən pivə içmək keçirdi. Dostumla adama bir pivə aldıq. Mağazadan aralanıb şüşənin ağzını açmağa macal tapmamış post-patrul xidmətin əməkdaşları bizə yaxınlaşdılar.
Salamsız-kəlamsız başladılar suallar yağdırmağa: “Gecənin bu vaxtı, belə soyuqda pivə içərlər? Təzə içməyə başlamısız, yoxsa boşaltdığınız şüşələrin sayını itirmirsiz? Neçə yaşınız var ki, indidən pivə içirsiz?”
Hətta polislər “mentalitet suallarına” da əl atdılar: “Ayıb deyil məhəllədə əlinizdə pivə gəzirsiz? Burda xalqın ailəsi-uşağı yaşayır, bunu fikirləşmirsiz?”
Nə baş verdiyini anlamaq istəyirdim. Amma beynim olanları qəbul etməkdə çətinlik çəkirdi. İstəyirdim bu alicənab polislərə deyəm ki, gecə vaxtı, soyuq havada, məhəllədə, parkda, gəzə-gəzə pivə içmək qadağasını kim qoyub axı, harda, hansı qanunda yazılıb bu? Bu qadağanı kim müəyyənləşdirib? Ümumiyyətlə, mənim harda pivə içməyimin kimə nə dəxili var? Can mənim deyil? İstəsəm içərəm, istəməsəm içmərəm. Mən beynimdə bu sualları fırlatmaqdaykən dostum məndən cəld tərpənib dəyərli məsləhətlərinə görə polislərə təşəkkür elədi, onlar da maşını tərpədib uzaqlaşdılar.
Polislər çoxdan çıxıb getmişdilər, amma dostumla mən hələ də onların bu yersiz müdaxiləsindən danışırdıq. Məhəllədən çıxahçıxda cavan bir oğlan bizi səslədi.
Bayaqkı polislər kimi o da salamsız-filansız bizi “istintaqa” çəkdi: “Məhəllədə ana-bacılarımız var, ayıb deyil əlinizdə pivə gəzirsiz? Bura sizin üçün Amerikadı, ürəyiniz istəyəni eləyəsiz?” Söhbətin böyüyəcəyini görən dostum onu da yola verməyə çalışdı. Bu dəfə də ötüşdü...
Qanımın bu qara vaxtında yadıma çal-çağır düşdü, yəni may ayında Bakıda keçiriləcək “Avroviziya” yarışması. Axı bu yarışmada ölkəmizə çoxlu turist gələcək, yəqin çoxu da avropalı olacaq. Hamı bilir ki, onlar pivəni su yerinə içirlər. Təsəvvür edək ki, “şortik”li bir alman əlində pivə şüşəsi məhəlləyə çıxır və ayıq-sayıq polislərimiz, yaxud da işi-gücü məhəllədə tum çırtlamaq olan “qaqaşlar” onu saxlayıb başlayır mentalitetimizdən, məhəllənin daxili intizam qaydalarından danışmağa.
Bu cür xoşagəlməz halların baş verməməsi üçün yarışmanın Təşkilat Komitəsinə təkliflərim var. Yaxşı olar ki, bu cür cavanlardan ibarət başqa bir komitə də yaradılsın və turistlər Bakı torpağına ayaq basan kimi, yəni hələ gəzməyə-içməyə fürsət tapmamış onları versinlər bu komitənin ixtiyarına. Qonaqlarımıza isti-isti “Azərbaycanda özünü necə aparmalı” mövzusunda mühazirələr keçirilsin ki, özlərini pis aparıb ölkəmizin adını batırmasınlar.
Belədə o bekar cavanlara da iş tapılmış olar.
